Vetëm JU dhe SHBA-ja, edhe një herë, mund ta shpëtoni Kosovën!

Vetëm JU dhe SHBA-ja, edhe një herë, mund ta shpëtoni Kosovën!

Vetëm JU dhe SHBA-ja, edhe një herë, mund ta shpëtoni Kosovën!

Shkruan: Halim Hyseni

Letër e hapur Ambasadorit të SHBA-së, z. Greg Delawie

Mos e mbështetni njëanshëm një qeverisje të keqe, joetike, antikombëtare, e cila abuzon dhe plaçkit pronën publike

Nëse po, pse nuk ia thoni kësaj “elite” keqqeverisëse dhe joetike të Kosovës, e cila këtë popull e ka katandisur në këtë gjendje dhe e cila në dëm të interesave dhe të vlerave të fituara me luftën heroike të UÇK-së dhe miqve në krye me SHBA-në , për çdo ditë janë duke e rrënuar të ardhmen e këtij vendi, për shkak të interesave të tyre meskine, për t’u pasuruar, dhe për të ruajtur postet dhe privilegjet e tyre marramendëse

I nderuari ambasador Delawie, unë jam një qytetar i thjeshtë dhe i Republikës së Kosovës. Kam qenë dhe akoma jam veprimtar, mbrojtës dhe mbështetës i flaktë i të drejtave dhe të lirive themelore të njeriut. Nga kjo fushë, pos dhjetëra punimeve të botuara në gjuhën shqipe, serbe dhe angleze i kam të botuara edhe katër libra të kësaj natyre në gjuhën shqipe. Këtë e kam bërë dhe akoma jam duke e bërë, sepse nuk ka asgjë më të shenjtë për ekzistencën e species njerëzore në planetin Tokë se të kuptuarit, bindja dhe të vepruarit ashtu siç edhe thuhet në Nenin 1 të Deklaratës së Kombeve të Bashkuara për të Drejtat e Njeriu: “ Të gjitha qeniet njerëzore lindin të lira dhe të barabarta në dinjitet dhe në të drejta. Janë të shpërblyer me arsye dhe vetëdije dhe ndërmjet vete duhet të veprojnë në frymën e vëllazërisë”.

I nderuari Ambasador, aq sa di unë, dhe sa kam lexuar për më shumë se gjashtë dekada, në asnjë vend të botës, dhe në asnjë dokument botëror, shpirti dhe germa e këtij neni, nuk është mishëruar më fuqishëm dhe më mirë se sa në “ Deklaratën e Pavarësisë së SHBA-së” të vitit 1776, vendit dhe shtetit të cilin secili shqiptar, pavarësisht nga mosha,  gjinia, bindjet politike dhe fetare e ka në zemër, si pjesë të pandarë të qenies dhe të ekzistencës së tij.

Unë jam i bindur se kjo nuk është e përkohshme, sepse këtë ndjenjë nuk do të mund flakë asnjë individ, as shqiptar e as amerikan me dashje apo pa dashje me veprimet dhe sjelljet e tij dashamirëse ose dashakeqëse.

Me këtë duhet ta them haptas dhe fuqishëm se nuk jam dhe nuk mbështes Peticionin e nënshkruar apo çfarëdo peticionin tjetër nga çdokush për largimin e ekselencës tuaj, por më duhet ta them haptas dhe fuqishëm, se ju me deklaratat e njëanshme dhe nga aspekti i vogëlsisë time përballë një zyrtari të lartët të SHBA-së, jo vetëm që keni përdorur një gjuhë jodiplomatike, por edhe lënduese që këtë popull nuk e qetësojnë, por e ndajnë duke çuar drejt një konfrontimi të përgjakshëm vëllavrasës, meqë jeni duke mbështetur njëanshëm një qeverisje të keqe, joetike, antikombëtare, cila një kohë të gjatë abuzon dhe plaçkit pronën publike, që është e lidhur me krimin e organizuar dhe korrupsionin dhe që ka tendencë të hapur për të vendosur despotizmin e plotë duke u thirrur në votën e dhënë të shqiptarëve në zgjedhjet e fundit.

I nderuari, Ambasador

Më lejoni që nga dokumenti i madhërishëm i “Deklaratës për Pavarësinë e SHBA-së “ të vitit 1776, dokument të cilin unë e konsideroj jo vetëm themelin e civilizimit botëror, por edhe bazën e ekzistencës së species njerëzore në planetin TOKË të citoj vetëm një pasazh të vogël të cilin si po më duket mua nuk e keni në kujtesë dhe ku thuhet: “Por, pas disa abuzimeve dhe plaçkitjeve, të cilat ndodhin në vijimësi qëllimi i të cilave tregon përpjekjen që t’i nënshtrojë me despotizëm të plotë, është e drejtë dhe detyrim i tyre të largojnë qeverinë e tillë dhe të kujdesen për rojtar të ri të sigurisë së tyre të ardhshme”.

I nderuari Ambasador, Ju pyes publikisht, kjo e drejtë universale e njerëzve a vlen edhe për njerëzit e Kosovës. Nëse po, pse nuk ia thoni kësaj “elite” keqqeverisëse dhe joetike të Kosovës, e cila këtë popull e ka katandisur në këtë gjendje dhe e cila në dëm të interesave dhe vlerave të fituara me luftën heroike të UÇK-së dhe miqve në krye me SHBA-në , për çdo ditë janë duke e rrënuar të ardhmen e këtij vendi, për shkak të interesave të tyre meskine , për t’u pasuruar, dhe për të ruajtur postet dhe privilegjet e tyre marramendëse .

Ju, i nderuari Ambasador, duhet të dini dhe shpresoj se para ardhjes tuaj keni marrë informacione për historinë e Kosovës dhe të popullit shqiptar. Shpresoj se jeni informuar për ËNDRRËN e shqiptarëve mijëvjeçare për liri dhe pavarësi, e cila falë luftës dhe guximit heroik të UÇK-së dhe ndihmës që populli amerikan bashkë me NATO-n dhe BE-në në vitin 1999, këtë ëndërr e bëri realitet.

I nderuari Ambasador, kjo ëndërr e shqiptarëve për liri dhe pavarësi është thellë e ngulitur në frymën, shpirtin, gjakun, secilën qelizë dhe secilin kapilar të pjesës dërmuese të shqiptarëve. Kjo ëndërr , z. Ambasador, është pjesë e ko-ekzistencës së shqiptarëve. Pa këtë ëndërr shqiptarët e Kosovë nuk mund të jetojnë.

Me duar në xhepa në Bruksel

Me bisedat që janë duke u zhvilluar në Bruksel, nga “ përfaqësuesit” e shqiptarëve që me duar në xhepa shkojnë në bisedime, me ata që kanë qenë urdhërues të vrasjeve, djegieve, përdhunimeve, dëbimit të një milion shqiptarëve nga Kosova, ëndrra pjesërisht e realizuar ka filluar të venitet. Këta njerëz të papërgjegjshëm, pa ndjenja kombëtare, pa etikë të cilët për t’i mbuluar keqpërdorimet, abuzimet, zhvatjen, korrupsionin, krimin e organizuar pjesë - pjesë, pa transparencë jo vetëm që janë duke rrezikuar ëndrrën pjesërisht të realizuar, por me marrëveshjet që i kanë nënshkruar Kosovën e kanë bërë lëkurë leopardi. Me marrëveshjet për demarkacionin Kosova është tkurrur dhe ngushtuar. Këta zotërinj dhe këto zonja që zhvillojnë biseda inferiore në Bruksel kanë nënshkruar vetëm marrëveshje që shkojnë në interes të Serbisë e jo të Kosovës. Edhe ato marrëveshje të cilat janë nënshkruar, të cilat do të mund të ishin interes dhe lehtësim për popullatën joserbe të Kosovës, Serbia nuk i përfillë dhe nuk i realizon.

Me marrëveshjet e nënshkruara në Bruksel në kundërshtim me të gjitha parimet e të drejtës ndërkombëtare dhe në shkelje të gjitha dokumenteve të Drejtës Ndërkombëtare: Kartës së Kombeve të Bashkuara, deklaratave dhe të konventave ndërkombëtare të miratuara në Kombet e Bashkuara, në Kosovë është institucionalizuar diskriminimi në baza etnike dhe racore, duke e krijuar një superkomb pakicë që sundon dhe pengon zhvillimin dhe të drejtën e një bashkësie tjetër ët kombeve mikste prej 93 %. Ky diskriminim racor duke krijuar një superkomb të privilegjuar me Marrëveshjen për Asociacionin e Komunave Serbe përfundimisht do ta tretë dhe do ta humbë ëndrrën mijëvjeçare të popullit shqiptar.

I nderuari Ambasador, e pranoj se nuk e di, andaj Ju pyes Juve, sikur Presidenti Obama të kishte nënshkruar me vetëdije një marrëveshje me të cilën cenohen interesat e SHBA-së të vërtetuara edhe nga Gjykata Kushtetuese, a do të mund të qëndronte ne vendin e Presidentit. Unë besoj se ai jo që nuk do të mund të ishte President, por do ishte në burg. Ky është mendimi im, nëse nuk është i saktë, unë kërkoj ndjesë publike.

I nderuari Ambasador, ju lutem keni durim dhe ndani pak kohë për t’u informuar dhe të keni pak empati për këto tragjedi të këtij populli.

Një kushëri i ndjerë imi, në fshatin Makoc, këtu afër Prishtinës që quhej Fehmi Hasimja është prerë copa - copa për së gjalli me motor për prerje të drurëve nga armata dhe policia serbe në vitin 1999. Në këtë masakër nuk ka qenë ky i vetmi, por shumë të rinj të cilit janë nxjerrë nga rreshti i njerëzve të dëbuar nga shtëpitë e veta me qëllim të pastrimit etnik nga Kosova. Edhe këta e kanë pasur të njëjtin fat. Për këto krime që janë bërë me dijen dhe lejen e Vuçiqit, Nikoliqit, Daçiqit dhe të epigonëve të tjerë të Slobodan Milosheviqit askush nuk ka dhënë përgjegjësie deri me sot.

Kriminelët enden të lirë

Masakrat e bëra nga forcat e armatosura të Serbisë, në Reçak, Meje,  Rogovë, Poklek, Çikëtove, Burojë, Prekaz, Çirez, Izbicë, Likoshan, Krushë, Fushë- Kosovë, Mitrovicë Suharekë me rrethinë, Orllan, Podujevë, Gjilan, e dhjetëra e dhjetëra vende të tjera të cilat janë vërtetuar, ekzistojnë dëshmitë, janë identifikuar emrat dhe mbiemrat edhe të kryerësve, të gjithë pjesëtarë të forcave  ushtarake dhe policore të Republikës së Serbisë, të gjithë edhe sot të avancuar në polici dhe ushtri, me përjashtim të ndonjë pensionist apo të vdekurit, shëtisin të lirë në Kosovë dhe në Serbi.

Unë nuk e di a dini apo jo se askush nga këta vrasës ordinerë nuk ka dalë para drejtësisë. Do të ishte ky një satisfaksion, një lehtësim shpirtëror sikur të kishte ndodhur drejtësia dhe vrasësit edhe të shqiptarëve dhe ata serbëve, të kishin dalë para një gjykate objektive dhe të paanshme. Pa u ndëshkuar askush për krimet e bëra po zhvillohen bisedat në Bruksel.

I nderuar Ambasador, më fal, por unë dua të jem eksplicit dhe bindës, më duhet t’ua rikujtojë seancën e parë kur u hodh gazi lotsjellës në Kuvendin e Kosovës, kur JU të gjithë përfaqësuesit e Kuintit treguat mungesën totale të ndjenjës së dhembjes dhe të empatisë për rastet të cilat i përmendi Donika Kada për vajzat që ishin përdhunuar dhe ishin hedhur bunar. Sikur vetëm një, nga Ju pjesëmarrësit e Kunitit, të kishit shfaqur shqetësim dhe empati për këto raste, nuk do të përsëritej as gazi, as nuk do të kishte protesta, se populli i përvuajtur shqiptar, di të ndajë shapin nga sheqeri. Ai do të ishte i lumtur që Ju dhimbjen e ndatë me ta. Ju mbi këtë narracion për krimin as që e regjistruat, kaluat mbi këtë krim të tmerrshëm pa u shqetësuar fare. Sikur ky të ishte i vetmi rast, bota do të duhej të tronditej, por raste të këtilla janë me qindra mijëra, i nderuari Ambasador Delawie ,nga viti 1878 deri në vitin 2000.

Dhuna serbe ndaj shqiptarëve

I nderuari Ambasador, a keni dëgjuar ndonjëherë për “Buzëqeshjen shqiptare “! Jo. Informohuni për këtë dhe gjëra të tjera të masakrimit të shqiptarëve!

(1) Në vitin 1912, në Kosovë Serbia shpiku lojën me emër” “Lojërat me të porsalindurit”. “ Të porsalindurit( kuptohet shqiptarë) hidheshin përpjetë, thjesht vërtiten në ajër, dhe priten prej një grupi ushtarësh me bajoneta të zbërthyera. Përpëlitjet e të porsalindurve shqiptarë në maje të bajonetave quheshin ndryshe “ Buzëqeshje shqiptarësh “.

(2) “ Në Gllogovc , pas pastrimit të terrenit, pashë një grup prej 400- 500 shqiptarë (gra, fëmijë , pleq). Dikush deshi të shtinte, por e ndërpreva. Më vonë pashë tmerrin! Kufoma të copëtuara, shtëpi të djegura (dëshmi e policit serb ). “

(3) “Një koleg imi i kërkoi para një civili shqiptar të moshuar mbi 70 vjeç. E pyeta nëse ishte normal dhe pse e bënte një gjë të tillë. Ai e vrau atë, sepse i kishte vetëm 10 marka! Ai polic ende punon. Unë këtë vërtet nuk e kuptoj... ( deklaron polici humanist serb)”.

(4) “Më kujtohet kur u vranë çobanët e paarmatosur, që nuk kishin thikë as për të prerë bukën. Komandanti Radoslav Mitroviq dha urdhër që ‘t’i linim të rreziteshin!’. Kjo në gjuhën tonë të koduar donte të thoshte, t’i vrisni me gjakftohtësi!”. Kuptohet epilogu

(5) Për të gjitha këto dinte komandanti Nenad Stojkoviq. Ai ishte personalisht i pranishëm kur policët e njësitit në fshatin Bajgorë, te miniera ”Trepça”, vranë një fëmijë me të meta mendore dhe nënën e tij, në shtëpinë e të cilëve kemi kaluar natën. Kur e pyeta përse e bënë një gjë të tillë, më thanë se nuk kishim nevojë për dëshmitarë.”

(6) “Një anëtarë i Çetës së Pirotit, që i takonte Sektorit 87, të Njësive Speciale të Policisë, i kishte prerë kokën një shqiptari të vdekur. Pastaj , për ditë të tëra e ka zier në tenxhere Nga ajo i nxori katër dhëmbë prej ari, pastaj ka shkuar në shtëpi, kafkën e ka lyer me llak dhe nga ajo ka bërë një llambë tavoline (...) Të njëjtën gjë e ka bërë edhe me një grua të vrarë. Edhe asaj ia ka prerë kokën, në të njëjtën mënyrë e ka zier, e çoi në shtëpi dhe bëri llambë tavoline. Fliste se dëshironte të kishte një çift llambash. Njerëzit normalë ishin tmerruar! Edhe komandanti i Kompanisë, edhe komandanti i çetës, edhe 80 % e policëve ishin në dijeni për këtë tmerr!...”

Zoti Ambasador, a jeni informuar për vrasjen e vëllezërve Bytyqi, qytetarë amerikanë të ekzekutuar në Serbi, para 17 vjetësh. A dini se  Nikoliqi , Vuçiqi, edhe Marko Gjuriqi, i cili kërkon që të dënohen ata që kanë vrarë serbë dhe cili  është bërë kryetari oficiel i Kosovës fare mirë e di jo vetëm kush i ka vrarë vëllezërit Bytyqi, por edhe kush ka marrë pjesë në vrasjen e mbi 10,000 shqiptarëve, kryesisht civilë, plaka, pleq, të rinj dhe në mesin e të cilëve janë mbi 1,300 fëmijë.

I nderuari Ambasador!

Nuk e di a e dini apo jo, por forcat e armatosura serbe në Kosovë kanë përdhunuar rreth 20, 000 gra dhe femra të moshave të ndryshme. Nuk e di a e dini, por shumë nga këto gra të dhunuara seksualisht janë gjuajtur të gjalla nëpër bunarë, mbi të cilat janë hedhur gurë e  dhe, për të mbuluar gjurmët. A e dini, dhe a keni pak empati për shqiptarët të cilëve gruaja u është dhunuar para burrit, vajza para prindërve dhe vëllezërëve. Mendojeni pak se si ndihen këta njerëz kur me mbështetjen e Brukselit dhe pajtimin e “përfaqësuesve” tanë, të cilit sot thirren në votën e fituar të qytetarëve, në  këto bisedime po i rehabilitojnë kriminelët dhe po e përgatisin terrenin për kthimin e tyre në vendin e krimit. Meqë jeni bërë mbështetës i qeveritarëve, të cilët, sipas Jush, janë legjitimë, sepse e paskan “marrë” votën e qytetarëve, pyeteni Hashim Thaçin se çfarë i ka ndodhur Valdrinit dhe familjes së tij në fshatin Obri, nga ku është edhe Hashim Thaçi. Pyeteni se si ndihet ai kur buzagaz shtrëngon duart me Vuçiqin dhe Daçiqin. I pari në atë kohë ka qenë ministër i Informacionit, ndërsa i dyti zëvendëskryetari i Slobodan Milosheviqit. Kthehuni pak prapa dhe bini në pozitën e atyre familjeve të vrara dhe të masakruara vetëm e vetëm pse ishin shqiptarë. Ju jeni neveritur me atë çka po bëhet në Parlament. Më shumë duhet të neveriteni me atë që i ka ndodhur popullit shqiptar dhe me atë që po i përgatitet pas perdeve gjeostrategjike dhe të rendit të ri ndërkombëtar. Kosovën ka filluar ta mbulojnë retë e reja të zeze dhe ogurzeza, në rend të parë prej njerëzve të tij gjakprishur, të cilët për interesa meskine, për të ruajtur postin, për të plaçkitur dhe për të vjedhur apo për ta mbrojtur lëkurën e tyre janë duke e kthyer Serbinë në Kosove, duke e instaluar dhe duke e institucionalizuar diskriminim racor. Zoti Ambasador, shkoni deri në Babin Most, fshat afër Prishtinës dhe shikoni se si mund të punohet në një shkollë që ka rreth 80 nxënës, me të cilët punojnë më shumë se 80 mësimdhënës, të cilët marrin rroga edhe nga Serbia, edhe nga taksapaguesit e varfër shqiptarë. Rrogat e këtyre mësimdhënësve janë qind për qind më të mëdha se të atyre që janë shqiptarë, boshnjakë, turq apo romë, ashkali dhe egjiptianë, a e dini pse? Sepse këta janë superkomb! Ajo që është shumë cinike dhe shumë dyfytyrëshe është se Kosova i paguan mësimdhënësit që zhvillojnë mësimin në gjuhën serbe nga buxheti i Kosovës, të cilët këta fëmijë i edukojnë për të bërë shfarosjen kreatve biologjike të shqiptarëve nga këto treva dhe për ta kthyer Kosovën nën Serbi. Këtë veprim nuk e bën asnjë komb tjetër në botë, përveç shqiptarëve. I nderuar Ambasador, a e dini se nxënësit serbë në Kosovë punojnë me tekste nga Serbia, ndërsa librat e dërguar nga Kosova për nxënësit shqiptarë janë të prangosur në terminalin e Bujanocit. A e dini se vetëm nxënësit shqiptarë të këtyre viseve, si në Afrikë, mësojnë pa libra, vetëm e vetëm pse janë shqiptarë dhe pse shteti i tyre “demokratik”, i cili i ka plotësuar standardet për hapjen e bisedave për  anëtarësim në BE, në realite sillet si një shtet racist. Unë në shumë shkrime, fjalime dhe në trajnime, por edhe në libra i jam referuar një vjershe të shkurtër me titull: “Liria e tmerrit” e shkruar nga Xhevdet Bajraj, të cilës edhe një herë i referohem:

Liria e tmerrit

S’dua t’ua harroj;

Për hatër të ditës së nesërme

S’dua t’ua fal

Se nuk falin as të vdekurit e mi

S’dua t’ua kthej që të mos bëhem si ata.

I nderuari Ambasador, unë më nuk mendoj dhe nuk pajtohem me mesazhin e kësaj poezie, sepse gjithnjë e më shumë jam duke humbur besimin në drejtësinë ndërkombëtare dhe në rendin e ri ndërkombëtar, i cili gjithnjë e më shumë nga luksi i të pasurve të paktë në përqindje, por të fortë në armatim janë duke lëshuar rrugën e humanitetit dhe të filantropisë po e shkelin të drejtën ndërkombëtare, po i mohojnë dhe po abuzojnë me të varfrit dhe të dobëtit. Kështu, edhe bashkësia ndërkombëtare, tani po sillet ndaj Kosovës duke krijuar Gjykatë Speciale për Kosovën, e themeluar tërësisht mbi bazën e gënjeshtrave dhe të falsifikimeve serbe. Sipas kësaj logjike po del se Kosova ka qenë agresore, e jo Serbia. Këtu qëndron edhe mbështetja që ka Serbia nga bashkësia ndërkombëtare në Bruksel, me të cilat biseda Serbia, e cila ka bërë krime mbi shqiptarët, nëse dallojnë nga krimet të cilat terroristët e ISIS-it, të Asadit dhe të Rusisë tani janë duke i bërë në Siri dhe vendet e okupuara të Irakut, dallojnë vetëm pse krimet e Serbisë mbi shqiptarë kanë qenë më brutale se ato që ISIS është duke i bërë sot. A nuk duhet të shqetësohen shqiptarët për atë që i pret pas nënshkrimit të Marrëveshjes për Asociacionin dhe pas rehabilitimit të gjithë atyre që kanë marrë pjesë në krimet mbi shqiptarë, që janë futur në organet e sigurisë së Kosovës. Ju, i nderuari Ambasador, si mik i shqiptarëve dhe besoj edhe i humanizmit dhe i vlerave themeltare amerikane, mos u bini në qafë vetëm udhëheqësve të opozitës, sepse këta tani janë në të drejtë, sepse janë duke mbrojtur paqen e qëndrueshme dhe duke e mënjanuar konfliktin e ri serbo- shqiptar dhe mos i mbështetni ata që këtë vend e kanë sjellë  buzë greminës. Sa për informim, unë nuk jam anëtar i asnjë partie politike. I nderuari Ambasador, SHBA –ja dhe Ju jeni të vetmit që mund të ndalni përkeqësimin e mëtejmë të kësaj gjendjeje. Mos i mbështetni dy Marrëveshjet e nënshkruara, sillni njerëz të cilët do ta reformojnë në themel drejtësinë, mos kontaktoni me ata që janë në qeveri, për të cilët Ju keni informacione se janë të lidhur me krimin, korrupsionin, abuzimet dhe plaçkitjet, kërkoni që edhe në Kosovë të zbatohen vlerat e demokracisë amerikane, të cilat ky popull me zemërgjerësi të jashtëzakonshme do t’i miratonte dhe do t’i mbështeste. Unë nuk jam besimtar i asnjë feje, por fuqishëm besoj në ZOT, andaj haptas lus Zotin që përmes SHBA-së dhe personalisht Juve të ndihmoni që të mos rrokullisemi në greminë, se ky popull këtë nuk e meriton, fajtore është keq-udhëheqja dhe udhëheqja joetike. I nderuar Ambasador, nëse SHBA-ja dhe JU nuk angazhoheni që të ndalet kjo rrokullisje e tmerrshme, kam një paralajmërim dhe porosi për popullin shqiptar të Kosovës, se nëse nënshkruhen dhe zbatohen Marrëveshjet e arritura në Bruksel, me të cilat Serbia këmbëkryq kthehet në Kosovë, shqiptarët o duhet të ikin nga t’u shohin sytë, o të armatosen që të mbrojnë nderin e familjes dhe të kombit, sepse këta që janë duke i zhvilluar bisedat në Bruksel kanë nënshkruar kapitullimin.